FINANCIMI I PARTIVE POLITIKE DHE FUSHATAVE ELEKTORALE

Abstract

Njëra prej sfidave kryesore për zhvillimin e zgjedhjeve demokratike 
qoftë në shtetet me demokraci të konsoliduar apo shtetet me demokraci fluide 
është pa dyshim financimi i partive politike dhe fushatave elektorale. Ajo jo 
vetëm që kërkon infrastrukturë ligjore precize por njëkohësisht kërkon 
institucione shtetërore të cilat duhet të bëjnë auditimin objektiv të të hyrave dhe 
shpenzimeve të partive politike dhe fushatave elektorale.  
Financimin e partive politike dhe fushatave elektorale secili shtet e ka 
të rregulluar me akte të veçanta juridike. Madje në shumë shtete kjo çështje 
është e rregulluar me akte të veçanta ligjore, duke miratuar ligje për financimin 
e partive politike dhe fushatave elektorale.  
Në botën bashkëkohore financimi i partive politike dhe fushatave 
elektorale gjendet para sfidave të mëdha. Këto vështirësi nuk i kanë vetëm 
shtetet të cilat janë në kërkim të konsolidimit të demokracisë përfaqësuese, te të 
cilat ekzistojnë shumë mangësi, duke filluar që nga mungesa adekuate e 
infrastrukturës ligjore për financimin e partive politike dhe fushatave elektorale 
e deri te institucionet që janë të obliguara të bëjnë menaxhimin tyre. 
Vështirësi mjaftë të mëdha për kontrollimin e financimit të partive 
politike dhe fushatave elektorale kanë edhe shtetet në të cilat demokracia 
përfaqësuese është e konsoliduar, duke pasur parasysh se fushatat elektorale 
janë bërë mjaft komplekse, për shkak të mundësisë së financimeve jo zyrtare, 
kryerjes së shërbimeve anonime, propagandës përmes mjeteve të internetit etj. 
Nëpër këto vështirësi po kalojnë edhe shtetet që janë djepi i demokracisë 
përfaqësuese, në të cilat pluralizmi politik dhe sistemi shumë partiak kanë 
traditë mbi treqind vjeçare. 
Megjithatë, në botën bashkëkohore janë miratuar një varg aktesh 
ndërkombëtare për financimin e partive politike dhe fushatave elektorale si dhe 
menaxhimin e tyre. Këto akte përbëjnë parimet bazë për modelet e 
infrastrukturës ligjore dhe auditimit të financimit të partive politike dhe 
fushatave elektorale të shteteve veç e veç.